Encontros de bibliotecas

O sábado 18 de novembro tivemos en Santiago as xornadas de bibliotecas escolares. As sesións máis interesantes foron as dedicadas á banda deseñada en especial a inaugural de Miguel Anxo Prado titulada "Imprescindibles Bedetecas". Entre as súas recomendacións figuraron títulos que temos incluídos no noso plan lector de 1º e 2º de ESO. Os nosos parabéns á profesora Laura por acertar de cheo na elección dos títulos!

De grande proveito foi tamén a intervención de Sira González e Xosé Antón Vilaverde, quen fixeron a súa escolma de banda deseñada e manga segundo grupos de idades. Pecharon este encontro Xulia Pisón, autora de Microalgas, e Jorge Campos, quen deseñou a cartelería de bibliotecas escolares deste ano e colaborador de Papapagaio. 

Foi dende logo un sábado moi ben aproveitado no que tomamos moitas ideas para a nosa biblioteca.