Primeira reunión do club de lectura co alumnado

Hoxe tivemos a primeira reunión coas nenas do club de lectura para a xente máis miúda. Imos ler #Bragakadabra de Antía Yáñez e xa nos xerou expectación. Benvidas ao insti e oxalá fagamos moitas lecturas xuntas 🙌🏼

XXV Concurso de teatro lido "Xosé Manuel Eirís" do FIOT

Onte Sofía, Alexia, Alba, Isaac e Pablo de 4ºA gravaron en Radio Nordés a peciña cómica Bonjour docteur!, coa que pasaron a primeira fase do XXV Concurso de teatro lido "Xosé Manuel Eirís" do FIOT.

Moita sorte na seguinte fase do concurso!! 

Nova maleta para a biblio!

 Xa temos na biblio e por un mes a maleta literaria do Centro de Extensión Universitaria e Divulgación Ambiental de Galicia (CEIDA).

A través do seu Centro de Documentación Ambiental, pon a disposición de todos os centros educativos de infantil e primaria unha colección de contos para achegarse á natureza a través da literatura. Trátase dunha selección de recursos motivadores para a educación ambiental, mais tamén para a animación á lectura, para imaxinar, divertirse, e emocionarse coas súas personaxes e historias.

A maleta literaria pretende que os nenos e nenas de idades temperás se acheguen a mundos máxicos que están moito máis preto do que se imaxinan. Coñecerán criaturas e seres incribles que son imprescindibles para a vida na terra. E aprenderán a relacionarse co mundo que lles rodea.

A maleta literaria apoia os Obxectivos número 13 “Acción por el Clima”, 14 “Vida submarina” e 15 “Vida e Ecosistemas Terrestres” dos Obxectivos de Desenvolvemento Sostible (Axenda 2030).

Días das Escritoras 2026

Hoxe celebramos o Día das Escritoras, unha data para poñer en valor a creación literaria feminina, visibilizar o traballo das autoras na nosa lingua e reflexionar sobre a importancia da literatura para entender o mundo que nos rodea.

Co motivo desta data, queremos destacar a figura e a palabra de Pilar Pallarés, unha das voces máis potentes, fondas e recoñecidas da poesía galega contemporánea (Premio Nacional de Poesía en 2019).

Hoxe La Voz de Galicia publicou unha entrevista a Pilar Pallarés na que a poeta nos convida a pensar sobre o sentido da creación, a memoria e a forza das palabras no marco da amizade. A súa traxectoria recórdanos a importancia de darlles ás escritoras o lugar central que lles corresponde na nosa cultura e no noso día a día.

Para sumarnos a esta celebración da mellor maneira posible —lendo e escoitando—, compartimos convosco este vídeo coa rapazada de 4.º en que a nosa compañeira Daniella pon voz a un dos poemas máis coñecidos do Livro das devoracións:

Recomendación da Biblioteca: Se quedes descubrir máis sobre a súa obra, pasa pola biblioteca do instituto! Na sección de poesía galega atoparás varios dos seus poemarios listos para levar en préstamo.

Animámonos a celebrar este Día das Escritoras lendo as nosas autoras e facendo soar a súa voz!

📻 Saída a Vigo coa Radio 🎙️

📍 Unha xornada de aprendizaxe e descubrimentos en Vigo! 🎙️🎨🌊

O pasado xoves 8 de outubro, o alumnado de 3ºA desfrutou dunha interesante excursión á cidade de Vigo.

Durante a xornada, tivo a oportunidade de coñecer Radio e Tele Vigo, descubrir a arte no Museo de Arte Contemporánea e achegarse ao mundo da investigación mariña no centro Nautilus, o observatorio submarino de Vigo. 

🚌✨ Unha experiencia enriquecedora, chea de novas aprendizaxes, curiosidade e bos momentos compartidos!

🤝 Queremos agradecer a colaboración da Concellería de Cultura, Educación e Deportes do Concello de Malpica por colaborar no financiamento do transporte en autobús e facer posible esta actividade.💙 Moitas grazas polo voso apoio!

#ExcursiónAVigo #3ºA #AprenderFóraDaAula #ExperienciasEducativas #Malpica

Certames para o Magosto e Samaín no centro 🧟‍♂️🌰

Anunciamos aquí as novas edicións dos certames para os próximos eventos do instituto.

Para a decoración e microrrelato do cadaleito teredes a plantilla na biblio e tamén lla poderedes pedir a Rocío. Para o concurso de relatos, recordade que se valorará moi positivamente a temática e inclusión de diálogos. Entregáde os vosos contos en sobre pechado e con pseudónimo.

Despois das datas límite anunciaremos xs gañadorxs con a maior brevidade posible. Sorte!

Ata o 20 de outubro

Límite: 30 de outubro

Ktorce18

Onte o alumnado de 1º e 3º da ESO participou nos obradoiros do programa Ktorce18, da Asociación ARELA e a Fundación Barrié, traídos ao centro polo departamento da Orientación e coa colaboración da biblioteca.

En 1º da ESO traballamos a prevención do acoso escolar e a importancia de non quedar á marxe cando alguén está a sufrilo. En 3º, falamos das condutas infractoras máis habituais na adolescencia e das súas consecuencias sociais e xurídicas.

Grazas a Alba, de ARELA, por achegar estes temas ao alumnado e abrir un espazo para debatir e reflexionar.

Remesa de novidades!

Xa recibimos a nosa remesa de incorporacións ao fondo con temáticas moi variadas: de ficción a neurociencia, pasando por banda deseñada ou deporte.

• Divulgación científica, arqueoloxía e neurociencia:
  
  
  • La prehistoria en la mochila (Ignacio Martín Lerma): Aborda a divulgación histórica e arqueolóxica de xeito accesible, achegando as orixes da humanidade e a prehistoria ao público xeral.
    
    
  • Cerebro en modo ON: Centrado na neurociencia e na psicoloxía, trata o funcionamento do cerebro, o desenvolvemento cognitivo e estratexias para optimizar a mente e a aprendizaxe.
    
    
• Sociolingüística e historia da lingua:
  
  
  • O libro negro da lingua galega (Carlos Callón): Analiza os episodios históricos de represión, marxinación e prexuízos contra o idioma galego ao longo dos séculos.
    
    
  • A lingua estranxeira: Afonda nas dinámicas do idioma, a identidade lingüística e a experiencia da comunicación.
    
    
• Ensaio político e crítica social:
  
  
  • Instrucións para converterse en fascista (Michela Murgia): Unha sátira e ensaio político que alerta sobre os mecanismos do autoritarismo e a perda de dereitos democráticos na sociedade actual.
    
    
• Narrativa e literatura contemporánea:
  
  
  • Moito que contar (Manolo Viña): Unha obra narrativa centrada nas experiencias vitais, na memoria colectiva e no relato de historias persoais.
    
    
  • Que me pare o corazón se te esquezo (Andrea Maceiras): Literatura xuvenil/contemporánea que explora as emocións, a identidade, os afectos e o paso do tempo.
    
    
  • Unha historia de amor como outra calquera e Nolwenn & Macha: Obras narrativas que tratan temas universais como as relacións persoais, os sentimentos, a amizade e os viaxes de descubrimento persoal.
    
    
  • Bragakadabra (Antía Yáñez): Literatura infantil e xuvenil que combina humor, misterio, amizade e maxia científica, abordando ademais temas de actualidade e crítica social como o uso e impacto das redes sociais na mocidade.

Velaquí tedes unha ligazón ao catálogo coas últimas compras por orde de adquisición.