G.P.A. (Galego Para Abrirmundos /ou/ Para Adolescentes)

Hoxe tivemos o pracer de recibir a Avelino González coa súa conferencia-espectáculo GPA nunha actividade promovida pola coordinadora dos EDLG. A nosa rapazada de 3.º e 4.º pasouno en grande e demostrou a súa aguda conciencia lingüística!

Día da lectura 2026

Hai momentos nos corredores e nas aulas nos que o reloxo parece deterse. A fotografía que compartimos hoxe é boa proba diso: o noso alumnado mergullado de cheo na maxia dun bo libro durante a hora de ler.

Durante este día da lectura, 3 de novembro, en homenaxe ao nacemento de Xosé Neira Vilas, recordamos que ler non é só adquirir coñecemento ou preparar tarefas; é viaxar sen movernos do sitio, vivir mil vidas nunha soa e atopar un espazo de calma e descubrimento no medio da nosa rutina diaria. Ver a biblioteca e os espazos do centro convertidos nun recuncho de lectores e lectoras apaixonadas recárganos de enerxía e recórdanos por que celebramos este día con tanta ilusión.

Grazas a todas e todos por encher as páxinas de vida. E ti, xa sabes cal vai ser a túa próxima aventura literaria?

Fin da semana AMI no centro

O fotógrafo non fixo xustiza ao esforzo desta rapazada que traballaba a eito na súa alfabetización mediática e informacional, arredor da cal xirará grande parte do ano na biblioteca. É por iso que empregamos materiais do Obradoiro de Verificación do Programa Prensa Escuela de La Voz de Galicia.

A celebración desta semana constitúe unha ocasión importante para mobilizar as partes interesadas a escala mundial co fin de crear conciencia, fomentar a participación a nivel nacional e celebrar os avances logrados en materia de Alfabetización Mediática e Informacional para todas e todos.

En tempos de emerxencia como os que vivimos as bibliotecas escolares deben, máis que nunca, reforzar o traballo cos medios de comunicación e identificación das noticias falsas e as competencias ALFIN e AMI.

O lema deste curso escolar para as bibliotecas escolares de Galicia pon o foco no papel das nosas bibliotecas na formación de persoas críticas e de ofrecer á súa comunidade programas estables e sistematizados de alfabetización informacional.

Primeira reunión do club de lectura co alumnado

Hoxe tivemos a primeira reunión coas nenas do club de lectura para a xente máis miúda. Imos ler #Bragakadabra de Antía Yáñez e xa nos xerou expectación. Benvidas ao insti e oxalá fagamos moitas lecturas xuntas 🙌🏼

XXV Concurso de teatro lido "Xosé Manuel Eirís" do FIOT

Onte Sofía, Alexia, Alba, Isaac e Pablo de 4ºA gravaron en Radio Nordés a peciña cómica Bonjour docteur!, coa que pasaron a primeira fase do XXV Concurso de teatro lido "Xosé Manuel Eirís" do FIOT.

Moita sorte na seguinte fase do concurso!! 

Nova maleta para a biblio!

 Xa temos na biblio e por un mes a maleta literaria do Centro de Extensión Universitaria e Divulgación Ambiental de Galicia (CEIDA).

A través do seu Centro de Documentación Ambiental, pon a disposición de todos os centros educativos de infantil e primaria unha colección de contos para achegarse á natureza a través da literatura. Trátase dunha selección de recursos motivadores para a educación ambiental, mais tamén para a animación á lectura, para imaxinar, divertirse, e emocionarse coas súas personaxes e historias.

A maleta literaria pretende que os nenos e nenas de idades temperás se acheguen a mundos máxicos que están moito máis preto do que se imaxinan. Coñecerán criaturas e seres incribles que son imprescindibles para a vida na terra. E aprenderán a relacionarse co mundo que lles rodea.

A maleta literaria apoia os Obxectivos número 13 “Acción por el Clima”, 14 “Vida submarina” e 15 “Vida e Ecosistemas Terrestres” dos Obxectivos de Desenvolvemento Sostible (Axenda 2030).

Días das Escritoras 2026

Hoxe celebramos o Día das Escritoras, unha data para poñer en valor a creación literaria feminina, visibilizar o traballo das autoras na nosa lingua e reflexionar sobre a importancia da literatura para entender o mundo que nos rodea.

Co motivo desta data, queremos destacar a figura e a palabra de Pilar Pallarés, unha das voces máis potentes, fondas e recoñecidas da poesía galega contemporánea (Premio Nacional de Poesía en 2019).

Hoxe La Voz de Galicia publicou unha entrevista a Pilar Pallarés na que a poeta nos convida a pensar sobre o sentido da creación, a memoria e a forza das palabras no marco da amizade. A súa traxectoria recórdanos a importancia de darlles ás escritoras o lugar central que lles corresponde na nosa cultura e no noso día a día.

Para sumarnos a esta celebración da mellor maneira posible —lendo e escoitando—, compartimos convosco este vídeo coa rapazada de 4.º en que a nosa compañeira Daniella pon voz a un dos poemas máis coñecidos do Livro das devoracións:

Recomendación da Biblioteca: Se quedes descubrir máis sobre a súa obra, pasa pola biblioteca do instituto! Na sección de poesía galega atoparás varios dos seus poemarios listos para levar en préstamo.

Animámonos a celebrar este Día das Escritoras lendo as nosas autoras e facendo soar a súa voz!

📻 Saída a Vigo coa Radio 🎙️

📍 Unha xornada de aprendizaxe e descubrimentos en Vigo! 🎙️🎨🌊

O pasado xoves 8 de outubro, o alumnado de 3ºA desfrutou dunha interesante excursión á cidade de Vigo.

Durante a xornada, tivo a oportunidade de coñecer Radio e Tele Vigo, descubrir a arte no Museo de Arte Contemporánea e achegarse ao mundo da investigación mariña no centro Nautilus, o observatorio submarino de Vigo. 

🚌✨ Unha experiencia enriquecedora, chea de novas aprendizaxes, curiosidade e bos momentos compartidos!

🤝 Queremos agradecer a colaboración da Concellería de Cultura, Educación e Deportes do Concello de Malpica por colaborar no financiamento do transporte en autobús e facer posible esta actividade.💙 Moitas grazas polo voso apoio!

#ExcursiónAVigo #3ºA #AprenderFóraDaAula #ExperienciasEducativas #Malpica

Certames para o Magosto e Samaín no centro 🧟‍♂️🌰

Anunciamos aquí as novas edicións dos certames para os próximos eventos do instituto.

Para a decoración e microrrelato do cadaleito teredes a plantilla na biblio e tamén lla poderedes pedir a Rocío. Para o concurso de relatos, recordade que se valorará moi positivamente a temática e inclusión de diálogos. Entregáde os vosos contos en sobre pechado e con pseudónimo.

Despois das datas límite anunciaremos xs gañadorxs con a maior brevidade posible. Sorte!

Ata o 20 de outubro

Límite: 30 de outubro

Ktorce18

Onte o alumnado de 1º e 3º da ESO participou nos obradoiros do programa Ktorce18, da Asociación ARELA e a Fundación Barrié, traídos ao centro polo departamento da Orientación e coa colaboración da biblioteca.

En 1º da ESO traballamos a prevención do acoso escolar e a importancia de non quedar á marxe cando alguén está a sufrilo. En 3º, falamos das condutas infractoras máis habituais na adolescencia e das súas consecuencias sociais e xurídicas.

Grazas a Alba, de ARELA, por achegar estes temas ao alumnado e abrir un espazo para debatir e reflexionar.