O luns 27 tivemos o noso club de lectura de familias de 18 h a 19 h na que intercambiamos opinións sobre a novela El jardín de Emerson. Valoramos moi positivamente a súa escritura aínda que a reflexión sobre a literatura e a memoria nos convenceu menos. Consideramos moi superior e a unha grande distancia Lluvia fina, todo un referente na narrativa castelá contemporánea. Como broche de ouro a esta sesión do club de lectura foi recibir a Chiki Fabregat ás 19.15 h. Benvida, Chiki!
luns, 27 de febreiro de 2023
Club de lectura: El cofre de Nadie, de Chiki Fabregat
Como antesala á chegada de Chiki Fabregat ao noso instituto quixemos facer un club de lectura cos alumnos e alumnas de 1º de ESO coa súa novela El cofre de Nadie, merecedora do premio SM Gran Angular de narrativa xuvenil 2021, de 15 a 16 h. Foi un club cargado de emoción e nerviosismo ante a inminente chegada da autora!
domingo, 26 de febreiro de 2023
Día de Rosalía
Durante o recreo do venres 24 conmemoramos o Día de Rosalía coa versión de "Adiós, ríos, adiós, fontes". O acompañamento musical púxoo Antía de 1º A e as voces Ángela de 2º A e Irene de 4º A. Grazas a todas!
Ímonos de voda!
Maleta viaxeira naturalista CEIDA
Día mundial da Radio
O luns 13 de febreiro, un grupo de alumnos de 3º A puideron conmemorar o día mundial da radio na emisora RadioVoz Bergantiños con Fran Rodríguez. Alí opinaron sobre as diferentes ligas de fútbol. Confiemos en que pronto poidamos xerar contidos desde a nosa emisora. Parabéns aos participantes!
luns, 13 de febreiro de 2023
Encontro con Chiki Fabregat
O martes 28 de febreiro teremos o pracer de recibir a Chiki Fabregat no noso instituto. Foi merecedora do Premio Gran Angular 2021 (Editorial SM) coa obra El cofre de Nadie, incluída no proxecto lector do noso instituto.
Esta actividade é posible grazas ao programa Encontros literarios con autores do MEC.
A gañadora do Premio Angular de Narrativa SM intercambiará opinións co alumnado de 1º A e 1º B e 3º A en dúas sesións diferentes.
Lembrade que o luns 27 teremos un club de lectura centrado na súa obra de 15 a 16 h. Podedes coller prestados na biblioteca os novos exemplares adquiridos.
Grazas, Chiki!
domingo, 12 de febreiro de 2023
Logo e nome da radio
O luns 13 de febreiro será o Día Mundial da Radio e para conmemoralo abrimos un prazo para buscar o nome e o logotipo da radio do centro. Animádevos a participar inspirándovos en Malpica e na súa contorna así como en Urbano Lugrís ou en Manuel María.
Tedes de prazo ata o luns 27 de febreiro. Grazas pola vosa participación!
xoves, 9 de febreiro de 2023
luns, 6 de febreiro de 2023
Club de lectura
O luns 6 de febreiro tivemos o noso club de lectura coas alumnas de 1º de ESO. Dentro da nosa operación de rescate quixemos recuperar unha das novelas de ambientación histórica escritas por María Isabel Molina: De Victoria para Alejandra. Valoramos positivamente esa loita da protagonista por atoparse entre dous mundos tan diferentes. Deunos tempo a deseñar unha cartoliña coas palabras chave, baixar á radio e intercambiar as nosas opinións.
Animámosvos a participar no club así como a ler outras novelas históricas desta autora, pois ten a virtude de transmitir a maxia de certos episodios históricos universais.
Club de lectura de familias
O luns 30 de xaneiro tivemos o club de lectura de familias de 18 a 19 h centrado principalmente na novidade editorial Obra maestra de Juan Tallón. Salientamos o reto e desafío co que naceu esta novela, situada no límite da non-ficción e a ficción. Quizais esta particularidade foi a que nos levou a moitos de nós a considerala unha obra densa e complexa. Que ocorreu para que desaparecese a obra de arte de máis de trinta toneladas feita por Richard Serra e que ata a data non se saiba nada dela? Curiosamente, estes días comentábase nas novas que o director do Museo Reina Sofía non continuaba ao frente do museo...
Moito mellor parada saiu a súa novela anterior, Rewind, a que se acaba de traducir ao galego. Esta obra explora o ocurrido tras unha extraña explosión nun edificio en Lyon na que morreron catro estudantes. Existe a posibilidade de rebobinar ou lóitase por sobrevivir malia a dor? Esta considerámola obra mestra da narrativa actual e polo tanto queda incorporada ao noso catálogo.
Taller de radio no Día da Paz
O luns 30 de xaneiro tivemos o taller de radio con Rosalía Fernández Rial. Na primeira sesión, Asier, Manuel, Brais Costa, Brais Pombo, entre outros, de 3ºA, ofreceron unha tertulia deportiva na que falaron das ligas locais e internacionais. O luns13 de febreiro participarán en Radio Voz Bergantiños.
Na segunda parte, o alumnado de 4º A e 4º B para conmemorar o Día da Paz recitaron varios textos, entre eles, algún de Manuel María.
Parabéns a todas e a todos pola vosa aportación!