Esta semana chegáronos catro mesas novas para a biblioteca procedente da Consellería de Eduación, que veñen con rodas e son pregables. Son moito máis manexables e operativas que as antigas.
Tamén en breve comezaremos co abrillantamento do chan.
Pouquiño a pouco imos renovando a nosa biblioteca, xa moi fermosa de por si.
Onte martes tivemos na biblioteca municipal o club de lectura e encontro literario con María Rei Vilas, quen nos falou da súa marabillosa novela Flores de ferro.
Antes, a modo de roteiro literario, fomos desde o centro da nosa vila ata perto de Santo Hadrián, para contemplar o mar, que ben puidera ser o de Briana co seu "azul cincento" mencionado tantas veces na obra.
Contamos nesta ocasión coa presenza dos clubs de lectura do CPI de Cabana de Bergantiños, que viñeron acompañados da súa profesora Carolina, integrantes do club de lectura de Carballo Aquelarre e público xeral de Malpica.
Ao final gozamos dunha chocolatada con pan de ovo, convite da consellería de Cultura do concello de Malpica. O noso agradecemento tamén á ANPA "Orxeira" quen nos axuda sempre en todo o que lle pedimos.
Foi un peche de ouro para os nosos club de lectura deste curso 2022-23!
O luns 8 de maio tivemos o noso club de lectura coas alumnas de 1º de ESO, a quen lle agradecemos a súa sempre boa predisposición. Nesta ocasión intercambiamos as opinións sobre a novela E Xoel aprendeu a voar de Marica Ocampo.
O sábado 29 de abril tivo lugar en Piñor o primeiro paseo literario en torno á narrativa de Carmen Martín Gaite.
Aproveitamos para convidar a David González Couso, especialista na súa obra, a unha charla na nosa biblioteca o vindeiro curso.
Na nosa biblioteca temos títulos seus como Caperucita en Manhattan, Retahílas e El cuarto de atrás.
Tivemos a oportunidade de gozar da exposición de Roberto Vidal Bolaño na nosa biblioteca. A compañía Condetrespés representou hai uns anos a súa obra Rastros. Sabiades que a Roberto Vidal Bolaño lle dedicaron tamén un ano o 17 de maio? Sabedes cando foi? Con estes cartaces queremos tamén conmemorar o Día Mundial do Teatro.
O xoves 27 de abril fixemos historia pois fomos o primeiro instituto galego en recibir a Elisa Delibes, presidenta da Fundación Miguel Delibes. O primeiro foi concerderlle o agasallo da vista das illas Sisargas ante o que quedou abraiada. Despois percorreu a exposición e comentounos que habitualmente os institutos só piden as láminas de El camino e que moi poucos a exposición completa.
Despois de estar connosco foi ao centro cívico de Cabana de Bergantiños onde a esperaba todo o alumnado da ESO do CPI As Revoltas e os estudantes de 1º de Bacharelato do IES Eduardo Pondal de Ponteceso. Alí uns alumnos e alumnas fixéronlle lecturas dramatizadas de El camino, Los santos inocentes e El hereje, entre outras obras.
Fran Rodríguez e Patricia Blanco fixéronlle unha entrevista que publicaron na Voz de Galicia pero a nivel autonómico na sección de Cultura. Traballaremos con ela nas aulas nos vindeiros días. Tamén Marta Villar en La Opinión deu conta da exposición e da visita da presidenta de Fundación Miguel Delibes.
Dificilmente esqueceremos este 27 de abril! Grazas, Elisa, pola túa humildade, cercanía e bondade!
