O CLUB DE LECTURA NO NADAL

Este curso imos aproveitar que non se pode saír moito da casa e os rapaces e as rapazas do club de lectura van continuar as súas lecturas durante o tempo de lecer e das vacacións.

O que sei do silencio xunto con Nacho Camacho: dúas maneiras
ben diferentes de enfrontarse á vida...

Para que todos e todas levasen ao seu gusto, diversificamos as lecturas e, ademais, seguiremos en contacto vía telegram para recomendarnos lecturas, para intercambiar opinións e, se é posible, para continuar vivindo e gozando das experiencias lectoras desde múltiples perspectivas.

Un de nós mente xunto con Wolfram... a intriga
está servida nos dous casos!!!!!

Ademais, como agasallo polo ben que están cumprindo todas as normas e o ben que levan que os clubs este ano sexan tan virtuais, vailles cada lectura cun agasalliño: unha bolsa, un caderno, un marcapáxinas e unha chapa... Continuando na liña da sensibilización pola Igualdade que traballamos de xeito transversal desde o centro.

Teatro e banda desañada estilo xaponés, unha para esmendrellarse
imaxinando a escena e outra para gozar de imaxes e textos!!!

O luns faremos a repartición na biblioteca e a voar... Felices lecturas!!!!

A CAIXIÑA DOS BOS DESEXOS

 Desde a biblioteca e xunto cos departamentos de linguas e titorías puxemos en marcha unha caixiña de bos desexos para entregar xunto cos boletíns o último día antes das vacacións (merecidas) de Nadal.

Este curso resultounos a todos un pouco raro e xa case nos afixemos ao distanciamento físico para preservarmos a nosa saúde.

O alumnado está cumprindo e dando leccións en cada recuncho de Galicia, polo que ben merecemos sentir que o estamos a facer ben, a pesar do que se bota a faltar ver as risas, as apertas, compartir a merenda e lermos coas cabezas pegadas.

Que emoción!!!

Actualmente todo é virtual, cada reunión, cada tarefa colaborativa, cada vez que nos queremos xuntar con amigos ou simplemente charlar e estamos seguras de que recibir unha nota física hanos de prestar a todos e todas.

Levamos unha semaniña coa caixa aberta e así seguirá ata o venres, así que podedes entregar na biblio as postais de bos desexos, que serán ben acollidas!

Algunhas sonche ben paveras!

NOVIDADES

 Este curso estamos tendo un lote de novidades para ofrecer aos nosos lectores, en galego, castelán, inglés, francés, en formato libro, banda deseñada, álbum, lectura electrónica...

Estamos bastante contentos e contentas coa renovación dos fondos que conseguimos facer, grazas ás suxestións tanto de profes, de libreiros e libreiras da zona coma do propio alumnado. Chegar aos seus gustos é o obxectivo, polo que pensamos que o cumprimos.

Proximamente faremos o folleto de suxestións lectoras para o Nadal, mentres, pasade pola biblio e botádelle un ollo aos andeis de NOVIDADES, terémolos cheíños, cheíños... aínda que estamos catalogando a toda máquina para que poidades levar para a casa nestas vacacións.

BOTAN A ANDAR OS CLUBS DE LECTURA

Este curso os clubs de lectura xuntarannos por medio das redes, e alí poderemos falar, opinar e comentar todo o que nos apeteza e as nosas impresións sobre as lecturas que vaiamos facendo.

O grupo do primeiro ciclo comezará por ler Resalgario, de Antonio Reigosa, esperamos que lles guste porque queriamos comezar cunha novela na que se pode ver o peso da nosa tradición oral, das narracións ás que os nosos oídos xa están afeitos.

O grupo do segundo ciclo xa andou a remexer coa triloxía de Carlos Meixide: Ons-Cans-Guitiriz e de aí xa saíu un bo traballiño na aula virtual. 

Pero agora imos botar man dunha das nosas autoras favoritas, Rosa Aneiros, e ler Ámote, Leo A., a última das novelas que pecha a triloxía, que algúns dos alumnos xa leron e que penso que nos vai gustar a todos e a todas.

Como teño que conectarme ao CLUB?

É moi sinxelo, temos que descargar a app de Telegram nun teléfono móbil e crear o noso usuario (podemos poñer as nosas iniciais ou o noso nome, incluso só a inicial e o curso en que estamos, como prefirades identificarvos, nunca vai aparecer o voso número en ningún lugar).

Unha vez que temos o telegram, entramos na canle do club de lectura, que é a seguinte:

CANLE TELEGRAM DO CLUB DE LECTURA

E unímonos a ela. A partir de aquí, e para non usar o móbil se non queremos, podemos abrir sempre a canle en telegram web, isto é, no ordenador. É a seguinte páxina:

TELEGRAM NO ORDENADOR

Se lle dicides que vos recorde os datos, incluso podedes eliminar a aplicación do móbil (sobre todo porque podedes usar a dos vosos pais/nais e iso talvez os moleste), se non lle dicides que recorde os datos, cada vez que entredes pediravos un código que se envía ao telegram do móbil. Decidide vós o que mellor vos conveña. Se queredes usar só o móbil, recoméndovos usar a opción de ter en silencio para que non vos piten as mensaxes cando charlemos, no horario que estableceremos. O grupo estará en todo momento moderado pola coordinación, que abrirá e pechará os momentos de intercambio nos días que se acorden.

Unha vez que entredes, xa iredes vendo que é moi fácil, deixarei unha mensaxe de benvida e irei iniciando a actividade esta mesma semana.

Feliz lectura e se tedes calquera dúbida, pasade pola biblioteca e falade con Luz, a coordinadora.

SECCIÓN DE LECTURAS TERRORÍFICAS

 Esta semana na nosa biblioteca o alumnado pode atopar unha boa sección de lecturas terroríficas, non só as propostas en anos anteriores, senón que a enchemos de novidades que vimos de adquirir grazas a estarmos dentro do PLAMBE.

Deixámosvos algunha fotiña para que vexades que, aínda que este ano non podemos ambientar a biblioteca como quereriamos, algo si puidemos facer, dentro da prudencia e abrindo unha posibilidade de lectura interesante para este tempo de costumes como a narración de historias relacionadas co medo, co alén, cos defuntos e con toda a tradición oral galega.

Desexámosvos felices lecturas e feliz sensanción de arreguizo polo corpo.

Sección de lecturas de medo ou terror

Moitas novidades para gozar nestes días

O noso esqueletiño tamén está pasando moito medo

MENÚ DE SAMAÍN

 A vindeira semana celebraremos que estamos no tempo do Samaín e que, polo tanto, é unha boa ocasión para falarmos das nosas tradicións, do alén e das lendas e historias de medo. 

Ademais diso, desde a biblioteca queremos ofrecer un menú de lecturas terroríficas ou de medo, para que poidades ter entre as mans unhas letras que vos arreguicen o corpo mentres as devorades.

Agardámosvos pola biblioteca, onde poderedes atopar estes volumes e moitos máis e felices (terribles) lecturas!

Deixámosvos tamén información interesante proporcionada pola RAG no Portal das palabras para este tempo:

Que quere dicir Samaín?

E xa para rematar, por se aínda tedes dúbidas, queredes pasar pola libraría, pola biblioteca municipal ou agasallar a alguén, unha boa suxestión para todas as idades feita polo profesor Román Cerqueiro Landín:

NARRAR O MEDO - GRANDES NARRADORES/AS

CLUBS DE LECTURA DO IES URBANO LUGRÍS

 Este curso poñemos en marcha os clubs de lectura botándolle tamén unha dose de imaxinación extra e suplindo a falta de cara a cara con tecla a tecla.

De entrada, pensamos en xuntarnos todos nunha canle de Telegram, por varios motivos: porque podes telo silenciado, porque non queda o teu número ao descuberto nunca, porque se poden enviar arquivos de interese en calquera formato, porque non tes que conectarte desde o móbil (serve tablet ou ordenador tamén)...

Así pois, de entrada, estaremos conectados 2.0 por medio deste blog e 3.0 coa canle de Telegram e, se é preciso, xuntarémonos por Wébex ou con algunha outra aplicación de vídeo que sexa accesible para todos e todas.

Se tes interese en participar, pasa pola biblio anotarte ou fala con calquera das profes de lingua: María Xosé, Rocío ou Luz para comunicarlle que che apetece estar no club.

Se máis adiante podemos xuntarnos algún día, farémolo e seguro que de bo grado!

Esta é a canle e aí despois iremos desagregando as persoas por lecturas que se vaian facer. 

CANLE TELEGRAM CLUB LECTURA

Este curso temos pensada unha boa miscelánea que poida contentar a todos os gustos: novela, teatro, poesía, banda deseñada...

Os de 4º xa andan coa triloxía de Carlos Meixide e axiña comezarán os de 3º con ela, xa lles propuxemos facer algún vídeo para deixar por aquí coas súas recomendacións, a ver se se animan!

VOLVEMOS ÁS AULAS E ÁS BIBLIOS!!!

 Pois parece que o curso, por fin, vai dar comezo e iso significa que volveremos ocupar os espazos e reencontrarnos con eles e con todo o que supón!

Este curso, na biblioteca todo muda un pouco, pero non por iso deixaremos de pasar por ela, de termos un club de lectura, de pensala como lugar de ocio durante o tempo de lecer...

Se algo nos mostrou o confinamento é que os libros, a música, as series, os filmes... toda a cultura é tan necesaria para nós coma calquera outra cousa. Que teriamos feito sen todo isto cando só podiamos voar coa imaxinación e non cos pés?

Así que estamos moi contentas de regresar, de volvervos ver, de ter vida de novo paseando por diante dos andeis e de que os libros atopen refuxio nas vosas mans e abran xanelas nas vosas e (nas nosas!) mentes.

Iso si, este curso será algo atípico e teremos que reconverternos, mudar hábitos, pero iso non é problema. Adiantamos algunha norma básica:

1. A capacidade máxima dentro da biblioteca física é de 28 persoas, pero neste blog cabedes moitos máis, sempre poderedes pedir o que precisedes por aquí e pasar despois recollelo cando mellor conveña. Tamén ha de haber unha caixiña fóra para que poidades facer peticións, se o preferides. Ah! A máscara, coma no resto do centro, tamén é obrigatoria :D

2. Tedes que seguir as direccións de entrada e saída sinaladas e sentar só onde estea marcado cun puntiño

azul. Importante non andar a remexer as cadeiras, porque está pensado pola vosa seguridade.

3. Se queredes algunha obra, de consulta ou de empréstito, debedes pedirlla á profe de garda ou a Luz, que se vai ocupar da biblio este curso. Ao rematar, haberá un lugar de depósito para deixala, tanto se a folleastes por

curiosidade, se a usastes para algunha tarefa, se a devolvedes despois de estar na casa... 

4. Os libros electrónicos tamén son unha boa opción e haberá uns cantos ao voso dispor, cheo de lecturiñas interesantes. E podedes facer suxestións de compra do que vos interese. Tamén hai nel obras nas linguas que vos dean máis xeito: inglés, francés, portugués... á parte, por suposto, de galego e castelán.

5. O club de lectura argallarase de tal xeito que poidamos reinventarnos: podemos ir lendo e quedar por wébex, faremos booktuber, pequenos podcast, unha canle de telegram que nos dea xeito... O caso é que non pare!!!!!

Vémonos axiña, estamos desexándoo!

#leonacasa

O 23 de abril conmemórase o día do libro e este ano, tal e como nos atopou, non puidemos festexalo no centro. Con todo, o profesorado quere aproveitar para mandarvos unha mensaxe positiva, que esperamos que o próximo ano poidamos reforzar con todos vós. Botámosvos moito en falta nas nosas vidas e esperamos que pronto poidamos encher a biblioteca, os corredores e as aulas.
Mentres, moito ánimo, coidádevos moitísimo e... lede moito, abride moitas xanelas ao mundo, porque o mundo é voso!
Feliz día do libro. Este ano #lemosnacasa

TERCEIRO TRIMESTRE - TAREFAS POR CURSOS E SEMANAS

O terceiro trimestre intentaremos organizalo máis polo miúdo. Previsiblemente, todo este trimestre será vía telemática, polo que é necesario o seguimento o máis ao día posible.
Desta volta, moitos dos vosos profesores xa puxeron en marcha aulas virtuais, polo que a comunicación será máis fluída dese xeito. Aqueles profes que non teñen aula virtual, deixarán nas carpetas a tarefa (e algúns tamén a porán repetida para aqueles aos que vos sexa máis fácil vir por aquí).
Estará organizada por semanas. Cada semana terá unha folliña de control da actividade onde estará anotado o traballo que hai para facer (o tempo que vos pode levar e cal é a data de entrega). Tamén ides ter na carpeta un horario de atención de cada un dos vosos profes, para que poidades contactar con el ou con ela, ben vía videoconferencia, por chat ou como estea especificado. Esperamos que isto vos sexa fácil de seguir e que enseguida nos afagamos todos, non vos agobiedes, sabemos que a situación é delicada e todos temos que ter empatía e paciencia. Acabaremos este curso fortalecidos e fortalecidas. Confiemos en que saia todo o mellor posible.

TAREFA PARA O GRUPO DE 1º

TAREFA PARA OS GRUPOS DE 2º

TAREFA PARA OS GRUPOS DE 3º

TAREFA PARA OS GRUPOS DE 4º

CAMBIANDO O CONTO

Hoxe na biblio presentamos o volume Cambiando o conto, que recompila os contos que escribiron os rapaces e rapazas de Malpica de Bergantiños. Logo dos obradoiros que impartiron coa asociación Visibles, os grupos que se fixeron continuaron ata darlle forma a unhas historias ben xeitosas que, posteriormente, foron ilustradas por Laura Tova e editadas en forma deste fermoso volume, no que un paxariño nos anuncia que dentro hai moito para escoitar e abraiar.

Sentimos moito orgullo como centro de que o noso alumnado vexa o seu potencial feito forma, que leven para as súas casas e para as súas familias unha mostra do grandes que poden chegar a ser. Moitos outros non deron acabado o produto en equipo, por falta da loxística propia do tempo en que están, mais o proceso foi igualmente enriquecedor e estamos certas de que haberá máis ocasións para todos e todas.








Moitas grazas a Olalla, quen promoveu os obradoiros desde a súa asociación e a Leticia, a concelleira de Igualdade por vir ata o centro e por transmitirlles esa alegría e ese orgullo polo futuro tan igualitario no que están traballando estas novas xeracións.




















E grazas, finalmente, ao alumnado que traballou arreo e que hoxe nos leu as súas creativas historias. Darlle a volta ao conto é un labor máis levadeiro se o facemos con persoas amigas!

O país das 20.000 fontes e das 10.000 penas

O alumnado do IES que agora está en 3º da ESO participou, xunto coa súa profesora Rocío Romar, na recolleita de microtopónimos que, doutro xeito, se acabarían perdendo inexorablemente.
O froito desta actividade, na que participou a comunidade educativa (familiares e veciñanza) xa pode verse no produto final, produto que non sería posible sen esa achega inestimable de todas as persoas que nel participaron.
Deixámosvos a ligazón á noticia que puidestes ler no xornal desta fin de semana:
Noticia na Voz de Galicia
E tamén vos deixamos a ligazón ao visor do proxecto GaliciaNomeada:
PROXECTO GALICIA NOMEADA
Traballamos coa arela de que o noso patrimonio inmaterial non se perda e é de agradecer que haxa unha implicación desta magnitude por parte da xente de Malpica de Bergantiños.

LECTURAS DA SECCIÓN DE IGUALDADE, TEN PREMIO!

Xa fostes moitos e moitas que vistes por aí circular as chapas e as bolsas e nos preguntastes como conseguilas.
Moi fácil! Só tedes que facer algunhas lecturas da sección de Igualdade e entregar a ficha na que nos contedes as vosas impresións e se recomendariades esa obra concreta. Deste xeito, contribuídes a espallar as lecturas, a ser uns críticos literarios fiables para o resto de alumnado e, como non, a gozar de obras escolleitas pensando só en vós.
Esperamos ver axiña moitas chapas máis e moitas bolsas máis pola vila e polo centro!

AMPLÍASE O PRAZO PARA O CONCURSO DE ILUSTRACIÓN E LITERARIO

Animamos a todo o alumnado a que participe no concurso de debuxo, cartel, biografía ou relato, tal e como indican as bases que se publicitaron.
A ANPA decidiu ampliar o prazo de presentación para que máis alumnas e alumnas puidesen presentar os seus traballos a concurso.
Animádevos!

AGASALLOS QUE CAMPAN!

No ronsel de actividades a prol da Igualdade que levamos facendo nas aulas e en obradoiros específicos fixemos uns agasallos ben xeitosos que van campar moito este verán por Malpica.
Como sabedes, na biblio temos de estrea unha sección de igualdade que, para alén de ser marabillosa, tamén vai levar consigo un premio.
Animádevos a pasar pola biblio e a conseguir a vosa bolsa ou a vosa chapa! IES Urbano Lugrís pola igualdade é o noso obxectivo e o que nos move cada día.

O deseño é do noso profe de XH Sergio!

Va que queda ben bonito?

ÚLTIMA CHAMADA PARA O I CERTAME URBANO LUGRÍS

A ANPA ORXEIRA xunto co departamento de Orientación, convoca o I Certame IES Urbano Lugrís.
Aínda estades a tempo de participar no certame, achegando o voso debuxo ou cartel e un relato ou biografía. Tal e como se estableceu nas bases, hai dúas categorías e podedes participar en ámbalas dúas.
Esta fin de semana, aproveitade para rematar as vosas obras, que posteriormente serán exhibidas no centro para que todas e todos poidamos gozar delas.

MÁIS NOVELAS NO LIBRO ELECTRÓNICO

Animámosvos a todos e a todas a que probedes tamén a lectura en formato electrónico. Por agora, estamos atendendo os gustos e peticións das persoas que máis uso lle están dando, pero estamos abertos a calquera suxestión que nos fagades.
Lembrade que o empréstito se fai por un mes e que teredes que coidar o dispositivo e cargalo adecuadamente, ese será o voso compromiso, ler moito e tratar ben o material!
Lembrade tamén que, á parte de en galego e castelán, podemos proporcionarvos lecturas en inglés, portugués, francés, romanés, italiano e as linguas en que faledes/leades ou queirades iniciar para mellorar.
Esperamos que a selección que imos facendo vos guste!

DECONSTRUÍNDO O AMOR ROMÁNTICO

Beatriz Guerra e Olalla, da Asociación Visibles, pasaron hoxe polo noso centro para traernos un interesante obradoiro: Deconstruíndo o amor romántico.
Un bo grupo de rapaces e rapazas enfrontáronse aos tópicos e prexuízos que nos rodean e cos que nos bombardean sobre o amor, sobre todo nos medios audiovisuais e nos produtos de ficción que consumimos cando somos máis cativos.

Unha vez identificados os mitos, é máis fácil velos como tal e ter máis ferramentas para construírnos, cunha autoestima e cunha estima polo noso corpo moito máis saudable.
Relacionármonos é máis fácil cando non levas ao lombo unha mochila cargada de prexuízos, condicionantes e estereotipos cos que a maioría da poboación non cadra ou cadra nunha porcentaxe moi pequena.
Grazas ás dúas polo traballo, seguro que os froitos xa comezaron a madurar!

DECONSTRUÍNDO MITOS DO AMOR ROMÁNTICO

Nas aulas este xa é un tema que se aborda, pois a literatura dános moito xogo para falar dos tópicos, do amor, da concepción das relacións amorosas en diferentes etapas da historia da literatura... e tamén en Historia, en Valores éticos... onde se vai traballando e comprobando que o xeito de relacionármonos ao longo do decorrer do tempo ou do espazo muda moitísimo e vai dependendo dos nosos costumes, da nosa cultura, pois non se mocea igual en Malpica hoxe ca hai cen anos, nin na Costa da Morte se ten a mesma idea ca nas Antípodas.
Ademais, estamos moi condicionados pola cultura cinematográfica, sobre todo americana, ao  quen amor romántico lles deu moito xogo para un monte de series e películas...
e así, chegamos ao 14 de febreiro, día que para nós pouco ou nada significaba ata que tamén houbo un interese económico por vendernos o AMOR, que, ao final é algo que se debe coidar a diario e que non necesita dun día cheo de agasallos materiais. Va que non?
Xa que logo, dentro do noso plan de Igualdade, que teimamos estender ao longo do curso ata onde nos sexa posible, teremos un obradoiro interesantísimo que afondará máis polo miúdo este tema cos nosos rapaces e rapazas máis experimentados! Veremos se lles gusta darlle a volta ao conto (un pouco máis)!!!

EMPRÉSTITO DE LIBROS ELECTRÓNICOS

Febreiro tráenos novas novidades para a biblio, entre outras, a posta en marcha do empréstito de lectores dixitais para aquelas persoas que devorades lecturas. Xa veredes como tamén vos ha gustar enganchar unha novela con outra e con tan pouquiño peso. Unha mochila sempre cargada con moitas lecturas para os tempos mortos, encantaravos!
Ademais, van xa cargadiños coas novelas e cos autores que máis vos gustan, en galego, en castelán e en inglés. Por outra parte, as persoas que leades noutras linguas: alemán, francés, portugués, romanés... só tedes que dicírnolo e nós atoparémosvos lecturas que vos poidan gustar nesas linguas.
A nosa biblio non ten fronteiras, polo que vos animamos a pasar por aquí para facervos cun deles e comezar a experiencia á de XA!

SECCIÓN DE IGUALDADE NA BIBLIO

Xa temos a nosa nova sección de Igualdade na biblioteca. Algúns rapaces e algunhas rapazas e profes xa comezaron a levar lecturiñas para a casa, isto non para! A nova sección énchenos de orgullo, porque todos e todas podemos atopar nela novelas gráficas, cómics, poemarios, narrativa... no que vernos reflectidos, cos que soñar un mundo máis igualitario, respectuoso e empático.
A co-educación e a educación no respecto pola diversidade son un obxectivo das bibliotecas escolares, así que benvida a sección e preparádevos porque traerá sorpresiñas agradables para os usuarios e usuarias que fagan lecturas dela!