BIBLIOTECAS DE AULA PARA A HORA DE LER

A hora de ler xa comezou no noso IES e as bibliotecas de aula están listas para a súa función. Son moi xeitosiñas estas novas caixas porque podemos limpalas, limpalas e limpalas. E tamén son fáciles de transportar para renovar as lecturas e en fin... que é moi bonito ver que de novo podemos andar coas lecturas de arriba para abaixo, comezando e deixando, comezando e continuando, que é o que nos gusta!

 

Confiamos en que esta selección, ademais das lecturas que poidades traer da casa, a prensa e calquera outras que vos propoñan na aula os profes de cada materia faga da hora de ler un momento de desconexión agradable, un punto de encontro de gustos literarios e axude a medrar, a mellorar a nosa capacidade de comprensión e expresión e, sobre todo, continúe a fomentar o gusto pola lectura.

Como se renovarán periodicamente, aceptamos suxestións, xa sabedes, comunicádelles os vosos gustos aos axudantes da biblio, aos profes colaboradores da biblio ou deixádelas na caixa de suxestións que haberá na sala da biblioteca.

MES DE OUTUBRO - MES DO MEDO

Este mes de outubro sempre o comezamos forte pola biblioteca. Despois da formación de novos usuarios, de axudantes de biblioteca e de xuntar os e as interesados no Club de lectura sempre xorden dinámicas semellantes. O que lles gusta da biblioteca é a liberdade.

Valoran as seccións temáticas, que haxa banda deseñada, cómics e manga, a sección de Igualdade e LGBTIQ+ e poder acceder libremente aos textos.

E o medo. O paso dos contos de medo para non ter medo (os lobos bos, os monstros que non o son, o home do saco riquiño...) ás historias de misterio, novelas policiais, crimes sen resolver, literatura oral que che pon os pelos de punta...

Así que decidimos darlles pola corda e festexar o medo, o misterio, o ambiente escuro... ademais, é o mes do Samaín, importante na nosa cultura, así que aló imos.

Temos en proceso unha exposición na que están/estamos traballando, de novela de medo e misterio; unha convocatoria de microrrelato; un concurso de seres terroríficos que veñen da reciclaxe; unha decoración monstruosa; un fanzine a moitas mans e ata un cemiterio ortográfico.

Iremos informando por aquí, seguro que teremos axiña moito que vos mostrar! Viva o medo!

BASES PARA O PREMIO DE MICRORRELATO

FORMACIÓN NOVOS USUARIOS E USUARIAS

 O día 8 os rapaces e as rapazas de 1º ESO virán á biblioteca para facer a súa formación. Estamos traballando nun pequeno xogo que nos deixe ver o que xa saben (que estamos seguras de que é moito) e intentaremos orientalos nos cambios que supón unha biblioteca de Primaria e unha de Secundaria. Moitos nenos e nenas xa están bastante emocionados coa nosa sección de igualdade, coas novidades e, sobre todo, coa sección de Manga, que este ano está arrasando e provocou que moitos e moitas se anotasen no Club de Lectura de Manga, que botará a rodar en breve.

Benvidos e benvidas, estamos desexando tervos pola sala coma peixes no estanque!

AXUDANTES DA BIBLIOTECA

O día 6 os novos e novas axudantes da biblioteca recibirán a súa formación para poder traballar na biblio desde a próxima semana.

Estamos moi contentas porque conseguimos un grupo ben xeitosiño e animoso que seguro que nos dará moitas alegrías á hora de contribuír na boa marcha da sala, das actividades que dinamizamos e nos labores máis propios de organización.

Benvidos e benvidas, xa sodes parte da familia da biblioteca! Confiamos no voso criterio e na vosa responsabilidade!

Club de lectura - NARRATIVA E POESÍA

As novelas polas que comezaremos xiran arredor de acontecementos históricos, de memoria histórica e tamén nos iniciaremos na novela policial.

Para os rapaces e rapazas de primeiro propoñeremos abordar unha historia que se ambienta en Chernóbil e que nos pode dar pé a desenvolver a empatía a fondo. Que farías ti se tes que desaloxar a túa casa dun día para outro? Que levarías? Que supoñería...?

Para os de terceiro pode ser ben ilustrativo comezar a ler novela negra, policial e de misterio máis alá da intriga. Sabemos que xa son moi consumidores de series negras, que coñecen moitas claves policiais de investigación e que non os defraudará.

E para cuarto vai ser unha boa lectura complementaria para o seu currículo achegarse a parte da historia que descoñecen e que sucedeu cabo de nós. Como os membros do club deste grupo son grandes amantes da historia moderna e contemporánea, estamos certas de que lles vai interesar moito!

En canto á poesía, darémoslle unha grandísima oportunidade ás Aldaolado, que nunca nos defraudan e leremos Ninguén morreu de ler poesía. Seguro que dela nos sairán uns proxectiños xeitosos.

 

Club de lectura - MANGA e NOVELA GRÁFICA

 Para botar a andar o club de manga xa temos decididos os primeiros títulos. Serán para iniciarse e para iniciadas/os. 

Estes son os que prevemos para o grupo de 1º e 2º ESO:

E para os grupos de 3º e 4º, xa que moitos coñecen os Jojo's do audiovisual, comezaremos cos volumes desde o principio, confiamos en que non haxa moitos spoilers.

Este curso, ademais, contaremos coa colaboración dos máis experimentados para que nos dean unha pequena clase do que significa o manga e tamén contamos con facer algún obradoiro para debuxar manga, para procurar noutras plataformas series manga e moitas outras ideas que se nos vaian ocorrendo.

E para aqueles que non teñan gana de manga, leremos esta novela gráfica que nos gustou moito a algúns o curso pasado e que xa temos en galego. 

Agardámosvos!!!!!

BUSCAMOS AXUDANTES E NOVOS MEMBROS PARA O CLUB DE LECTURA

 Este curso, por fin!, recuperaremos a figura dos axudantes da biblioteca. As súas tarefas consistirán en controlar os préstamos e as devolucións nos recreos, recoller a biblioteca despois de cada período de lecer, propoñer actividades, suxestións de compra, axudar coa decoración e promoción... Un membro máis do equipo que terá moito que dicir nel!

Sabemos que moitos e moitas xa fostes axudantes no cole e que tedes unha bagaxe impresionante, así que oxalá vos apeteza continuar sendo colaboradoras e colaboradores. 

A proposta é facer un calendario para que non sexa un labor moi extenuante ou pesado. Que dicides? Animádevos!

CLUB DE LECTURA

Por outra banda, este ano tamén volvemos facer o club de lectura presencial, o que permitirá que nos atopemos de novo os amantes e as amantes dos libros cara a cara.

A nosa previsión é ter de novo un grupo de cómic e manga, outro de narrativa e iremos combinando pezas teatrais e poesía.

As reunións faranse fóra do horario lectivo, preferiblemente os luns no tempo que temos para comer. Buscaremos un acomodo para traer o bocadillo ou o que queiramos e levaremos a cabo as actividades que xurdan de cada lectura. Tamén poderemos acordar outro día que vos caia mellor e atoparnos, por exemplo, na propia praia, porque para iso vivimos nun paraíso.

Animádevos a formar parte do club, a achegar as vosas ideas e gustos e a crear unha pequena comunidade.

Non perdades a oportunidade!

A BIBLIOTECA ESCOLAR TEN A PALABRA

Cartel de Pablo Otero

Volvemos ás aulas! O curso escolar comezou onte e, un ano máis, o noso IES encóntrase dentro do Plambe, así que a nosa biblio tratará de ser un fervedoiro de proxectos, ideas, lecturas, presentacións e alfabetización dixital.

Este curso non só volveremos con novidades, xogos e bibliotecas de aula, senón que tamén intentaremos ir recuperando a vida de alumnado colaborador, recreos animados, propostas de lecturas temáticas e moitas máis sorpresas nas que xa estamos matinando.

Os pequenos que se nos incorporan recibirán formación, aínda que sabemos que xa traen unha bagaxe estupenda do seu cole e só terán que se afacer a novas dinámicas. Confiamos en que o novo itinerario lector que preparamos no centro afonde nas súas ganas de ler e lles abra novos horizontes lectores.

A biblioteca escolar ten a palabra!

A CASA DE BERNARDA ALBA - alumnado de 4ºB

As rapazas e rapaces de 4ºB fixeron unha adaptación teatral do texto de La casa de Bernarda Alba que representaron na biblioteca.

A verdade é que é unha mágoa que non puidese haber público porque o seu esforzo pagou a pena. Con todo, deixámosvos aquí un anaquiño para que vexades o nivel. O ensaio foi intenso pero mereceu a pena.

Botaremos moito de menos no centro a Verónica, Elena, Jimena, Ana, Alicia, Andrea, Pablo, Brais, Andrea P., Iris, Noemí e Yéssica. Levan aquí catro anos e todas e todos deixan un bo recordo do seu paso por secundaria. Recibímolos sendo uns pequerrechos e marchan para Bacharelato sendo unhas/uns adolescentes marabillosas/os. 

Todo o bo que lles pase será pouco, foi un pracer pasar polas súas vidas!

OS LIBROS SON PARA O VERÁN

Este curso, alén das recomendacións lectoras que deixaremos por aquí, pensamos en deseñar os nosos propios libros soñados.

Todos e todas temos na cabeza unha historia, unha banda deseñada, un poemario... algo que leriamos sen dubidalo ou que editariamos de sermos unha editora.

Pois a iso iremos, o alumnado, durante estes días, deseñará ese libro e fará unha maqueta: a portada, a contraportada, a faixa, a biografía, o primeiro capítulo...

Deste xeito, volveremos traballar os xéneros, as partes do libro, os inicios que nos poden enganchar á lectura, a combinación de imaxe e texto... Andaremos estes días traballando neles e deixaremos por aquí o resultado. Este curso lucirán como novidades as creacións máis xenuínas, froito das imaxinacións máis fecundas, as dos nosos rapaces e rapazas.

Oxalá vos guste moito o resultado, así como a actividade!